مراكز الشرطة ..

اليوم كالعادة في حياتي .. بعد الطلاق يوم مميز لاني شفت بنتي واهيه مستانسة بروحة المدرسة .. بس طبعا شلون بيرتاح اللي ما ينطرى بدون ما يعفس مزاجي ومزاج بنته ..

امممم ... اشلون ..

اليوم متصلين فيني مركز الشرطة لانهم يبون اسم الشاهدة اللي تحضر جلسات الزيارة اللي اهوه طلبها .. طبعا عقب ما طلبها بالشرطة .. وبالمحاكم مع ان ما كان عندي مانع انه يشوفها والحين احنا شهر تسع والمحكمة حاكمة له انه يشوفها كل اسبوع يوم السبت في اللمركز الاجتماعي ( طبعا كلاكيعو ويبي يسوي بنتي نفسه ) المهم طبعا نسيت اقول ان المحكمة كانت حاكمة له من شهر 5 تقريبا او 6 وطبعا ما زارها الا اربع مرات في هالشهور كلها والقهر اني اوديها واهوه اللي ما ايي لها .. كالعادة متفرغ للحب والاعلام على قولته ( ويالله الاعلام عاد ) .. المهم اخر مرة قلت له شنو تبي بنتك تصير .. بالضبط نفس اعيال صديقتك العيوز ( وطبعا انا ادري ان صديقته معاي على الفيس بوك ) وتقرا كل اللي اكتبه .. فتنرفز وسب وتفل علي .. ولا احترم العشرة . وان بنته موجودة ...


المهم ان انا اللي عمري ما دخلت مراكز شرطة دخلني .. اكيد كل واحد يسوي عاى اصله .. بس انا اللي ابي اعرفة .. لو انا اللي كنت خاينه او طالبة الطلاق .. شنو كان بيسوي ...


حدة تافة صراحة .. وفاشل ...

المهم .. خلونا في الاشياء المهمة ..
امس رحت مقابله للمركز الاعلى للمرأة علشان وظيفة يديدة .. :))))))
وبابتدي في مركز للنساء المعنفات بعد :))))

وعندي خبر كلش حلو .. بس خله يصير وبنشرة ..

عاد ذكروا ربكم وقولوا ما شالله .......


حبيبي ابوي قاعد يقولي امس ان النحس راح عنج وصج .. راح عني ... بس بعد ابيكم تدعون لي عندة جلسة النفقة شهر 10 ، طبعا اللي يعرفون اللي ما ينطري يدرون ان يطرح مواضيع ويازعم اعلامي عن الاستقرار والحياة .. واهوه صار له سنة وثلاث شهور ما يصرف على بنته ..


اوففف اشلون كنت عايشة معاه ..
واشلون خذيته اصلا ..
على قولة امونه صديقتي .. اكيد كان مسوي لج عمل ....


يالله باي ...

مواضيع جديدة ..

اليوم الجمعة دائما افكر في موضيع جديدة احاول اكتبها للجريدة طبعا انا مب صحفية للي ما عندة خبر . انا اخصائية علاج نفسي . ومن صغري وايد احب اقرا واكتب بس دايما اخاف من الافكار اللي تينني في المواضيع واحاول امسك نفسي لانه ادري انا وايد ناس ما بيتقبلونها .. وخاصة اني ادري اني بكتب في شي موجود بس دائما افكر في اني في مجنمع خليجي بس اللي بيخليني اتجرأ اكتب وحتى اذا ما انشر بكتبه اهنية اهوه حبيب قلبي ابوي اللي دايما مساعدني واخواني واختي الغاليين ...

المهم قاعدة افكر اكتب موضوع فكرته ان في مجتمعنا الخليجي وطبعا بدون ذكر اللي يحبون يلعبون هل احنا نمارس الجنس علشان انحب او نحب علشان نمارس الجنس اكيد بحط الموضوع اذا كملته ....


بخليكم الحين وبرجع بعد شوي ...

اليوم كان اول يوم لحضانة بنتي شواقة حبيبة قلبي ..وما اعرف بالضبط شنو اللي صادني .. اول شي ما رقدت عدل في الليل واحلام وكوابيس جتني ( وشكله عقلي الباطن بدا يوسوس ) . بس كانت حبيبتي قمر ما شاء الله عليها .. كبرت بنتي .. والاهم من هذي كله ان ما حست ان قاصرها شي ابوي الله يخليه قعد من الصبح علشان يشوفها واخوي خالد تم مواصل للصبح علشان يوصلها الحضانه معاي وزوج اختي ياها بعد يبغي يوصلها يعني بما ان ابوها تركها ولاهي مع صديقته العيوز .. من سنة كاملة الله عوضها خمس ابهات او اباء ما ادري لون تنكتب ..


احبها احبها احبها ...

9/9/ مرت سنة

مرت سنة بالضبط على طلاقي طبعا طليقي العزيز نشر من سنة طافت على الفيس بوك انه طلقني .. يمكن اكون اول خليجية تطلقت على الفيس بوك بالثلاث مع ان في المحكمة طلقني طلقة واحدة .. المهم ان كتب اني طالق بالثلاث وانه بيتفرغ للحب والاعلام ..وطبعا انا سكت المهم .. اليوم كملت سنة على طلاقي وطبعا طلاقي بروحة قصة بس اهم شي ان اليوم ليلة العيد (مب مسلسل حياة الفهد ) وبنتي حبيبتي شواقة من اربعة ايام كملت ثلاث سنوات وبمناسبة طلاقي والعيد سشورت شعر شواقة محاولة لتحسين ما خربته الجينات . طبعا مو جيناتي .. جينات اللي ما ينطرى .. طبعا انا صار لي فترة وانا افكر اني اكتب وما ادري اذا قلت لكم ان صديقي الصدوق وزميلي في الشغل وابوي الروحي اهوه اللي شجعني اني اكتب عن كل اللي يصيدني ويصيد صديقاتي .. في كتاب ( السر ) the secrat قالوا ان قانون الجذب اهوه اللي يحرك كل شي حوالينا ويمكن هذي السر في ان اغلب صديقاتي مطلقات صرت مثل المغناطيس اللي يجذب المطلقات .. يمكن لاني دايما متفائلة حتى في طلاقي ..لا تفهموني غلط انا ما كنت سعيدة بطلاقي ولا انا اللي طلبت الطلاق على فكرة ومع اني مو مطوعة .. الا انا مقتنعة ان الله يبعد عنك شيء او شخص علشان يعطيك شي احسن منه .. وبعدين وفاة امي قبل طلاقي بشهر ونص كان صدمة اقوى من خسارة رجل .. وبين لي اشقد اهوه نذل وما صبر على في عز ازمتي ادري ان صديقاتي يعرفون السالفة واللي ما يعرفونها يبون يعرفونها ومتاكدة اني بقولها ..

المهم خلونة في ليلة عيد .. شواقة حدها مستانسة بشعرها وانا ما رحت الدوام ( مب عيارة ترى ) اجازة مرضية صج ..والحين بخليكم وبروح ويمكن ارجع اكمل لكم بس متى وعن شنو ما ادري ...

بداية الحكاية

ها انا في العمل . عملي الذي حلمت به منذ صغري ... اريد ان اكون اخصائية علاج نفسي بوزارة الصحة .... لا ادري لماذا احببت هذا التخصص .. اتذكر مقولة احد الاساتذة الذين درسوني في المرحلة الجامعية حين كان يقول لنا ان هناك دراسة تقول ان اغلب الذين يدرسون علم نفس تكون لديهم في الاساس مشاكل داخلية ويحاولون الحصول لها على علاج . فيتجهون لهذا التخصص . وبيني وبينكم لا ادري ان كانت هناك بالفعل دراسة تؤكد كلامة ام لان سكشنننا كان من الصفوف المشاغبة . ولهذا كان يريد احباطنا . فالمقرر الذي كان يعطينا اياه هو علم النفس التجريبي اي عن التجارب العلمية لعلم النفس . وطريقة تحضير العينات وما الى ذلك ولهذا لم تكن هناك مناسبة لقول هذا الكلام ....

المهم .. اليوم هو احد ايام رمضان .. ولا ادري لماذا في رمضان بالذات عندي يزيد العمل .. فقد انتهيت من مريضي لياتي الاخر على الفور لهذا .. ساترككم الان وارجع اكمل لكم .. بداية الحكاية ...